काठमाडौं,२२ साउन-मौसम पूर्वानुमान महाशाखाले मौसममा अझै सुधार हुन नसकेको बताएको छ। महाशाखाका अनुसार देशभर हल्कादेखि मध्यम वर्षा भइरहने छ। मंगलबार पनि वर्षा भइरहने छ भने बुधबारदेखि केही सुधार जनाइएको छ।

महाशाखाले साउन २२ गते (मंगलबार) दिउँसो र राति देशभर सामान्यदेखि पूर्ण बदली रही देशका धेरै स्थानहरूमा हल्कादेखि मध्यम खालको वर्षा हुने सम्भावना रहेको जनाएको छ। दिउँसो देशका थोरै स्थानमा भारी बर्षाको सम्भावना रहेको छ भने रातको समयमा मध्य र पूर्वका एक दुई स्थानमा भारी वर्षाको संभावना रहेको छ।

साउन २३ गते बुधबार दिउँसो र राति देशभर सामान्यदेखि पूर्ण बदली रही देशका केही स्थानहरूमा हल्कादेखि मध्यम खालको वर्षा हुने सम्भावना रहेको बताइएको छ।साउन २४ गते बिहिबार दिउँसो र राति देशभर सामान्यतया बदली रही देशका केहि स्थानहरूमा हल्कादेखि मध्यम खालको वर्षाको सम्भावना छ।

बुधबार बेलुकीसम्म खतरा तह पार गर्ने संभावना न्युन रहेको पनि शाखाले जनाएको छ । देशैभर हल्कादेखि मध्यम वर्षा र केही स्थानमा क्षणिक भारी वर्षाको संभावना भएकोले स–साना खोलानाला आसपास सतर्कता अपनाइराख्न शाखाले आग्रह गरेको छ ।